Додека Бастијан Швајнштајгер како телевизиски коментатор делува насмеано и опуштено на Светското првенство во САД, зад камерите, според германскиот „Билд“, минува низ еден од најтешките периоди во приватниот живот.
Според весникот, поранешниот германски фудбалер и неговата сѐ уште законска сопруга, поранешната српска тенисерка Ана Ивановиќ, водат дури две судски постапки поврзани со разводот. Едната се води во Минхен, а другата на Мајорка.
Во центарот на спорот, според медиумските извештаи, се алиментацијата, поделбата на заедничкиот имот и старателството над нивните тројца синови. Деталите од постапките не се јавно достапни, но германските медиуми наведуваат дека преговорите се одолговлекуваат.
Според „Билд“, покрај одлуките што ќе влијаат врз иднината на нивните деца, предмет на разговор е и имот вреден околу 110 милиони евра.
Медиумите потсетуваат дека Ана Ивановиќ и Бастијан Швајнштајгер уште пред бракот потпишале предбрачен договор од 64 страници, со кој ги регулирале финансиските и правните аспекти на бракот.
Според претходните информации, секој од сопружниците ја задржал имотната состојба стекната пред бракот. Се наведува дека Ана пред бракот заработила околу 20 милиони евра, додека богатството на Швајнштајгер, проценето на околу 90 милиони евра, главно било вложено во недвижности.
Во медиумите претходно беше објавено и дека Ивановиќ има доживотен договор со „Адидас“, вреден повеќе од 100 милиони евра, кој, според наводите, исто така е опфатен со предбрачниот договор и не е предмет на поделба.
Во меѓувреме, европските медиуми продолжуваат да пишуваат и за приватниот живот на Швајнштајгер по разделбата. Тој во последните месеци се поврзува со Бугарката Силва Капитанова, а дел од медиумите неодамна објавија дека и нивната врска наводно минувала низ криза поради несогласувања околу животот на Мајорка и високите трошоци за изнајмување луксузна вила.
Сепак, неодамнешните фотографии на парот од Мајорка, на кои се држат за раце, повторно ги поттикнаа шпекулациите дека кризата била само привремена.
Ниту Ана Ивановиќ ниту Бастијан Швајнштајгер досега јавно не ги коментирале наводите за судските постапки и разводот.
