Гоце Тодоровски искрено раскажа што направил за него легендарниот Петре Прличко, дедо му на Игор Џамбазов, а откри и како почнала неговата дружба со Џамбазов.
Во поткастот на Стефан Лазаров, легендарниот актер рече во еден период биле неразделни и многу се дружеле со Игор Џамбазов. Тој прво доаѓал секој ден во Драмски театар и му давале мали улоги, па потоа поголеми и се вработил во театарот.
– Ние имавме навика после претстава да седнеме во бифето на Драмски, и дојде дедо му Петре Прличко. На маса седевме едно десетина души и вели:
– Да ви кажам на сите, јас сега можам комотно да умрам зашто имам наследник. И покажа накај мене и вика: ‘Тој мене ќе ме наследи како комичар’. Пред сите луѓе, сите занемеа. Мене ме фати дури срам и незгодно ми беше.
Имаше и постари колеги и моја генерација но мене ме посочи, по претставата ‘Солунски патрдии’ во бифето“, рече Гоце Тодоровски и додаде дека тоа многу ми значело од повозрасен колега како Петре Прличко.
Прличко е роден на 13 март во 1907 година во Велес, а почина во Скопје на 16 ноември во 1995. Наскоро се навршуваат 30 години од смртта на легендарниот актер. Гоце Тодоровски е роден во 1951.
