Кога надвор температурите надминуваат 30 степени, последното нешто што сакате е да ја вклучите рерната. Токму затоа оваа пита е вистински погодок. Комбинацијата од крцкава подлога од бисквити, свежи и сочни праски и лесен крем освојува уште со првиот залак.
Состојки
За подлогата:
250 г мелени бисквити (може и интегрални)
120 г растопен путер
2 лажици шеќер во прав
За филот:
8–10 големи, зрели праски
1 конзерва (околу 400 г) засладено кондензирано млеко
60 мл сок од лимон
250 мл слатка павлака за шлаг, добро изладена
Подготовка
Во сад измешајте ги мелените бисквити, шеќерот во прав и растопениот путер, па добро соединете ги состојките.
Смесата распоредете ја и цврсто притиснете ја на дното и по рабовите на калап за пита со пречник од 24 до 26 см. Ставете го калапот во фрижидер додека го подготвувате филот.
Во друг сад измешајте ги кондензираното млеко и сокот од лимон. Мешајте додека смесата малку не се згусне и не стане мазна.
Излупете ги праските и исечете ги на кришки. Богато наредете ги врз изладената подлога од бисквити – колку повеќе праски, толку подобро.
Прелијте ги праските со смесата од кондензирано млеко и лимон, така што рамномерно ќе го покрие целото овошје.
Изматете ја слатката павлака во цврст шлаг и премачкајте ја преку питата.
Вратете ја питата во фрижидер најмалку 2 до 3 часа пред сервирање. Највкусна е ако се изеде истиот ден.
