Бурните реакции во регионот по повод видеото на која младиот хрватски пејач Јаков Јозиновиќ изведува песни од Марко Перковиќ Томпсон добија нова димензија, откако во целиот случај се вклучија и двете популарни пејачки Јелена Карлеуша и Милица Тодоровиќ.
Сè започна кога Милица Тодоровиќ застана во одбрана на младиот колега, истакнувајќи дека не гледа причина зошто на Јозиновиќ би му се забранил влез во која било земја:
„Зашто би му се забранил влезот? Не разбирам. Пееше хрватска песна, човекот е Хрват“, изјави Милица.
Сепак, нејзиниот став брзо предизвика реакција кај поп-дивата Јелена Карлеуша, која преку социјалната мрежа „Икс“ упати остра критика до својата колешка. Иако нагласи дека приватно многу ја сака Милица, Карлеуша ѝ замери за тоа што молчела кога таа соодветно се соочувала со забрани за настапи во Хрватска:
„Многу ја сакам Милица. Но, како моја другарка и сограѓанка, не се огласи кога мене во Хрватска ми го забранија настапот и не ја осуди јавно таа неправда. Ниту таа, ниту кој било колега. Зашто поддржуваме туѓо, а ја игнорираме неправдата кон сè што е наше? Таа ‘традиција’ мора да престане. Против сум сите забрани за пејачи и музика, но мора да имаме и трошка гордост и патриотизам кога се напаѓа нашето“, порача Карлеуша.
Овој јавен судир повторно ја отвори дебатата на естрадата околу забраните за настапи, колегијалноста и патриотизмот помеѓу регионалните музички ѕвезди.
