Нина Бадриќ најави дека нејзиниот нов албум „Моите луѓе“ ќе излезе на 13 февруари, а по тој повод со своите следбеници на Инстаграм сподели искрено и емотивно размислување.
„Да се направи албум денес е вистинска напорна работа. Особено ако се занимавате со поп-музика на овие простори. Се поставува прашањето, како и зошто воопшто да се издава албум? Ми велат: не се исплати, не се продава, никој веќе не слуша албуми. Со тоа не можам да се согласам. Затоа што ако се согласам, би ја поништила мојата публика со која растев сите овие 30 години.
И секоја песна што нам ни значи. Секоја што оставила трага во времето. Секогаш сум се водела по себе. Сум пишувала и пеела она што го чувствувам и живеам, сум созревала заедно со моите песни и сум ја живеела секоја емоција. Таков е и овој албум – ’Моите луѓе‘. Тој носи зрелост. Зрелоста што ја живеам сега.
Дали ова е најдоброто? Не знам. Но е најдоброто што во овој момент знам да го дадам.
Секоја песна е одраз на мене, на мојот живот, моите чувства и сè што во овој момент сум во состојба да го кажам. Овој албум е досега најмалку авторски мој, затоа што им се препуштив на други автори, во чии песни ги пронајдов моите приказни“.
