Градоначалникот на Гостивар Арбен Таравари ќе биде в.д. претседател на Алијансата за Албанците. Таква одлука е донесена на денешното централно претседателство на партијата, откако Зијадин Села поднесе оставка поради лошите изборни резултати во Тетово.
– Имам поддржувачи кои стојат зад мене и зад партијата и ќе биде неблагодарно од моја страна да се повлечам од политиката. Јас ќе бидам внатре во политиката, активен и ќе бидам таму каде што ќе побара Алијанса за Албанците и новиот претседател, изјави Села.
Таравари е лекар и поранешен министер за здравство. Специјализирал неврологија во 2006, а во 2011 ја одбранил докторската дисертација од областа на Паркинсонова болест.
Во 2010 година, започнал да биде редовен предавач на Медицинскиот факултет при Универзитетот Св. Кирил и Методиј. Во 2016 бил претседател на одделот на екстрапирамидални болести при универзитетската клиника за неврологија, а бил член на одборот на меѓународните медицински списанија „Mediicus“ и „Vox Medici“.
Исто така бил раководител на одделението за мигрена, главоболки и други синдроми при Универзитетска клиника за неврологија.Таравари е оженет со Нора и е татко на две деца.
