Македонија годинава повторно има своја претставничка на еден од најголемите светски избори за убавина – Мис Гранд Интернешнл 2025, кој се одржува во Бангкок, Тајланд.
Нашата земја ја претставува Илирјана Салиу од Куманово, медицинска сестра по професија, која веќе блесна на првото појавување пред светската публика.
На отворањето на натпреварот, Илирјана се појави во впечатлива сребрена тоалета на модната куќа Елена Лука, која стои зад сите нејзини креации што ќе ги носи во текот на престојот во Тајланд. Со својот изглед и самоувереност, таа веднаш привлече внимание, а поддршката не изостана и од дома.
„Нашата убава Илирјана Салиу веќе е во Бангкок и блеска на Мис Гранд Интернешнл 2025. Ѝ посакуваме многу среќа и неверојатно патување“, објавија од официјалниот профил на Мис Македонија.
Мис Гранд Интернешнл е познат по тоа што оди подалеку од традиционалните избори за убавина. Под мотото „Забавувајќи го светот со убавина“, на сцената се спојуваат мода, уметност, технологија и култура, создавајќи спектакли што се следат низ целиот свет.
Оваа година, дури 77 претставнички од различни земји ќе се борат за посакуваната титула.
