Само една недела пред настапот на Евровизија, хрватската група „Лелек“ се соочи со непријатни вести. Јудита Шторга, една од членките, има здравствени проблеми откако добила стрептококна инфекција, поради која привремено останала без глас.
Јудита пред два дена се огласи на Тикток, каде објави видео во кое ги изговара стиховите од песната „Andromeda“, додека во рацете држи кутии со лекови.
„Евровизија е за една недела, а јас сум без глас“, напиша таа во видеото.
Таа откри и дека прима антибиотици поради стрептококата, но нагласи дека веќе се чувствува значително подобро.
„Треба да биде подобро“
Поради нејзината состојба, многумина се запрашаа дали здравствениот проблем ќе го загрози настапот на хрватските претставнички на Евровизија и колку ваква бактериска инфекција може да влијае на изведбата.
Одговор даде оториноларингологот проф. д-р Дaвор Вагиќ, кој објасни дека антибиотиците обично почнуваат да делуваат во рок од 48 часа, но дека опоравувањето зависи и од имунитетот, пишува Нет.хр.
„Со терапија и мирување, за два до три дена од почетокот на антибиотиците состојбата би требало да се подобри“, истакна лекарот.
„100% подготвена нема да биде“
На прашањето дали тоа значи дека Јудита ќе биде целосно подготвена за настап, лекарот бил јасен дека тоа не е реално.
„Сто проценти фит – нема да биде. Но постои можност сепак да настапи. Се работи за бактериска инфекција и тешко е да се предвиди реакцијата на организмот. Ако добро реагира на терапијата во првите два дена, шансите се поголеми. Но не може да се очекува да пее како ништо да не се случило“, изјави тој.
Тој додаде дека станува збор за чувствителна ситуација, но дека во наредните денови ќе се види како ќе делува терапијата.
View this post on Instagram
