Концертот на пејачката Драгана Мирковиќ, кој се одржа синоќа во Сплит, бил накратко прекинат поради дојава за поставена бомба, пренесуваат хрватските медиуми.
Според информациите од полицијата, на 7 март во 00:23 часот на бројот 192 се јавило лице кое пријавило дека во клуб на подрачјето на Сплит е поставена експлозивна направа. По пријавата, на местото веднаш биле испратени полициски службеници.
Објектот бил превентивно евакуиран, по што специјализиран полициски службеник извршил противексплозивен преглед. За време на проверката не било пронајдено експлозивно средство, по што клубот повторно продолжил со работа околу 1 часот по полноќ.
Од полицијата соопштија дека е во тек криминалистичка истрага за случајот.
Во меѓувреме, Драгана Мирковиќ се огласи на социјалните мрежи и порача дека вечерта сепак завршила во одлична атмосфера.
„Сплит, ви благодарам за прекрасната ноќ“, напиша пејачката покрај видеото на кое се гледа преполн клуб и публика која во глас ги пее нејзините најпознати хитови.
