По десетгодишна пауза, македонскиот пејач Елвир Мекиќ ѝ се враќа на македонската музичка сцена со дуетска песна со најпопуларниот изведувач меѓу младите, раперот Христијан Настески – Пајак.
Популарноста која денес ја ужива Пајак е налик онаа на Мекиќ и Јован Јованов пред петнаесетина години, времето на најголемата експанзија на македонската популарна музика.
Песната „Негде после два“ не само што има сличен наслов на култната „Некаде после два“, туку и музички потсетува на тој ретро аренби звук.
„Мислам дека направивме добар спој со кој ќе ја опфатиме постарата публика, а Пајак ја има помладата публика. Логично е оние деца кои имаат 15 години да не ме познаваат“, изјави Мекиќ.
Музиката е дело на Пајак, текстот е на Елвир Мекиќ, а аранмжманот го направи Иван Јованов – Ивајо. Интересно е тоа што текстот на песната е напишан од насловите од најголемите хитови на Мекиќ како: „Некаде после два“, „Армија“, „Ич не ме боли“, „Слаба точка“ и др.
Видеозаписот е во режија на Гордан Божиновски од продукција „Урбан рекордс“ и е сниман на две локации – трговскиот центар „Дајмонд“ и хотелот „Лимак“. Во спотот се појавуваат моделите Драган Стојчевски и Евгенија Петрушевска.
