Денеска на 77-годишна возраст нѐ напушти бардот на македонското глумиште, еминентниот актер Мето Јовановски.
Голем број колеги се простија од најугледниот претставник на македонската филмска и театарска уметност, меѓу кои и актерот Васил Зафирчев, кој му посвети емотивна објава на социјалните медиуми.
„Како гром од ведро небо ме удри веста за ненадејното заминување на драгиот и многу почитуван актер, колега и пријател Мето Јовановски. Единствен и неповторлив. Топол, едноставен и скромен во приватноста, а жив оган на сцената и филмското платно. Најголемиот меѓу големите. Најмаркантното и најреферентното актерско име на нашиот театар и филм. Бескрајно сум му благодарен за искреното пријателство кое го споделувавме, за неговите совети и препораки со кои растев и созревав како актер, но и за големата привилегија и чест да соработувам заедно со него. Царство небесно за неговата прекрасна душа и вечна слава и сеќавање на неговото име, неговиот лик и неговите дела“, напиша Васил Зафирчев.
