Шарлиз Терон беше главна ѕвезда на црвениот тепих (која во оваа прилика беше виолетов), на премиерата на анимираниот филм „Семејството Адамс“, која се одржа во Лос Анџелес. Прекрасната актерка носеше комбинација со потписот на Диор.
Елегантната бледо-сина кошула Шарлиз ја искомбинира со плисирано здолниште со должина до глуждовите. Интересното здолниште славната убавица го носеше со рамни црни шпицести чевли.
Стајлингот за премиерата на филмот „Семејството Адамс“, 44-годишната шармантна актерка го дополни со тенки метални ланчиња, ситни обетки, крупни прстени и црна кожна полуракавица на левата дланка, а го истакна и со ремен во облик на долго јаже од коноп како додаток на здолништето.
Во новиот анимиран филм за легендарното семејство Адамс, Шарлиз Терон го позајми гласот за Мортиша Адамс, а останатите актери кои го позајмија своите гласови за ликовите се Оскар Исак (Гомез Адамс), Клои Грејс Мортез (Венздеј Адамс), Фин Волфхард (Пагзли Адамс), Ник Карол (вујко Фестер), Снуп Дог (Ит), Бет Мидлер (бабата) и многу други.
