Македонскиот пејач и музичар Владо Јаневски почина вечерва на 66-годишна возраст, по кратко боледување. Според објавените информации, тој починал на една од скопските клиники.
Јаневски беше едно од најпрепознатливите имиња на домашната музичка сцена и автор на бројни песни кои оставија траен белег во македонската поп-музика. Меѓу неговите најголеми хитови се „Ако не те сакам“, „Евергрин“, „Дома си е дома“, „И тогаш некоја будала“, „Некогаш и негде“, „Црно тиквешко“, „Ова е наше Скопје“, „Не зори зоро“ и „Еден бакнеж“.
Роден е на 27 ноември 1960 година во Скопје, а дипломирал на Филолошкиот факултет, на Катедрата за англиски јазик и книжевност. Во текот на кариерата бил дел од музичките состави „Тост сендвич“, „Бон Тон“, „Фотомодел“ и „Ластовица“, а свирел клавир, гитара и тапани.
Во 1998 година стана првиот официјален претставник на Македонија на Изборот за песна на Евровизија, каде што со песната „Не зори зоро“ настапи во Бирмингем. Настапуваше и на бројни домашни и меѓународни музички фестивали, меѓу кои Југовизија, „Славјански базар“, како и фестивали во Ирска, Турција и Египет.
Во текот на својата кариера објави шест студиски албуми и остави богато музичко творештво, по кое ќе остане запаметен како еден од највлијателните македонски поп-изведувачи.
