Фолк-пејачката Дара Бубамара е новиот член на жирито во најгледаното регионално музичко натпреварување „Ѕвездите на Гранд“.
Веста која првично ја објави српскиот медиум „Курир“ сега доби и официјална потврда од продукцијата.
– Со големо задоволство и возбуда објавуваме дека на жирито на „Ѕвездите на Гранд“ му се приклучува Дара Бубамара. Во текот на својата богата кариера, Дара изгради статус на фолк-икона, пејачка со автентичен стил, безвременски хитови и со непогрешливо сценско присуство. Нејзиното музичко знаење, долгогодишно искуство и природна комуникација со публиката ја прават извонредно засилување на нашиот тим. Убедени сме дека нејзината енергија, харизма и директност ќе внесат свежина и дополнителна динамика во шоуто – се вели во соопштението на „Гранд“.
Промената доаѓа откако пејачката Марија Шерифовиќ, по финалето на последната сезона, објави дека го напушта жирито. Како нејзина наследничка, медиумите ја посочуваа токму Дара, а сега тоа е официјализирано.
Името на Драган Којиќ Кеба, исто така, се споменува како можен нов член. Тој во неколку наврати претходно ги заменуваше членовите на жирито кои биле отсутни, а публиката позитивно реагираше на неговите настапи во таа улога. Според пишувањата на српските медиуми, меѓу Кеба и продукцијата постои усмен договор, но сè уште не е дадена официјална потврда за неговото ангажирање.
