Македонецот Сашо Башески (54) е еден од годинашните победници на музичкото регионално натпреварување „Никогаш не е доцна“.
Пејачот, кој има потекло од Прилеп, освои најголем број СМС гласови (6.087), а наградата му ја предаде нашата поп-дива Калиопи Букле.
„Нè направи многу горди. Многу сум среќна. Ти благодарам што нè потсети на едно убаво време кога се пееше не само со грло, туку и со емоции!“, изјави Калиопи.
Инаку, Башески неодамна се соочи со неубава семејна ситуација – неговата мајка Павлина доживеа мозочен удар. Сепак, нејзината состојба сега е многу подобра и тоа му дало поттик да продолжи да се натпреварува во „Никогаш не е доцна“.
„Мајка ми беше во една од минатите емисии и кратко потоа имаше мозочен удар. Беше тоа мошне тешка ситуација и мислев да се повлечам од натпреварувањето, како и од фестивалот во Прилеп, каде што треба да настапувам, но потоа состојбата почна да ѝ станува сè подобра и подобра. Сега веќе е сосема добро и тоа ми даде поттик и сила да продолжам“, изјави тој.
