По бројните вербални напади и бојкотот на потрошувачите поради изразената естетска униформираност, модната куќа Victoria’s Secret одлучи да ја смени својата политика. Ја ангажираше првата трансродна манекенка, чија физичка убавина може да се мери со најубавите манекенки во светот.
Станува збор за Валентина Сампаио, модел, манекенка и глумица која е првата трансродна личност во историјата што се појавила на насловната на „Вог“.
Таа е 22-годишна Бразилка која е родена како момче, а на возраст од 8 години сфатила дека всушност се чувствува како девојче. Четири години подоцна го сменила името во Валентина.
Откако категорично негираше дека треба да имаат трансродни личца во ревијата во ноември минатата година, Ед Разек, маркетинг-директорот на компанијата, беше под силен притисок откако половина интернет се побуни против неговите зборови.
Разек на својот твитер-профил се извини, велејќи дека веќе го разгледувале кастингот на трансродни модели за ревија и дека никогаш не станувало збор за полот.
Со оглед на тоа што оваа година ревијата нема да се одржи, Валентина Сампаио ќе ја гледаме само на билбордите и на другите рекламни места.
