Џенифер Лопез и Алекс Родригез повторно „се пуштија“ во водите на бизнисот. Двојката, на која богатството се проценува на околу 750 милиони американски долари, дел од своите сретства вложи во нов бизнис, односно во бренд за кафе.
Така, славната двојка стана ко-сопственик на компанијата „Kitu Life, Inc.“, основана во 2016 година во Америка, која произведува „Super Coffee“, линија на кафе без шеќер.
„Моите браќа и јас сме воодушевени што продолжуваме да го градиме нашиот бизнис заедно со Џенифер и Алекс“, изјави Џим Де Кико, извршен директор на „Super Coffee“.
Родригез првпат слушнал за брендот „Super Coffee“ во 2018. А денес, компанијата се проценува на 240 милиони долари,
„Браќата кои стојат зад „Super Coffee“ се вклопуваат во нашиот план. Тие изградија силна компанија за кратко време и со нетрпение очекуваме да му помогнеме на брендот да го достигне својот целосен потенцијал“, вели Родригез.
„Веднаш знаевме дека можеме да ја искористиме нашата мрежа за да го изградиме овој бренд на глобално ниво“, изјавила Лопез.
Оваа вест е навистина парадоксална, имајќи го предвид фактот дека Џенифер Лопез отсекогаш била „голем противник на пиењето кафе“, ѕвездата неколку пати во нејзината кариера има изјавено дека никогаш не пиела и не планирала да пие кафе.
„Не пијам алкохол, не пушам цигари и не внесувам кофеин во моето тело. Овие работи ја уништуваат кожата, особено како што старееме“, изјави Лопез за магазинот „Us Weekly“ во 2016 година.
Затоа, ќе биде многу интересно да се види како сега ќе го промовира ова кафе. Можеби таа ќе стекнува нови навики…
