Српската пејачка Анѓела Игњатовиќ, позната како Бресквица, се огласи по гласините дека познатиот кошаркар Лука Дончиќ се разделува со својата свршеница Анамарија Голтес поради неа.
Имено, Дончиќ и Голтес наводно ја раскинале свршувачката и ја откажале свадбата која требало да се одржи летово. Уште пред тоа, на социјалните мрежи почнаа шпекулации што го поврзуваа словенечкиот кошаркар со младата пејачка. Сега Бресквица реши јавно да се изјасни и да ја раскаже својата страна од приказната.
Таа призна дека била изненадена од тоа колку веста се проширила низ светот.
„Изгледа дека јас сум дежурниот виновник за сè што се случува“, рече таа.
Пејачката додаде дека ја шокирале некои од насловите во медиумите.
„Разбирам ако некој видел дека лајкнал неколку мои фотографии па луѓето почнале да коментираат, но кога го видов насловот ‘Бресквица виновна за развод’, навистина се изненадив“, изјави таа.
Според неа, во последно време често ја поврзуваат со различни луѓе.
„Ме спојуваат со секого, изгледа тоа сега е модерно. Ова ми е веќе втор кошаркар со кој ме поврзуваат, првиот беше Богдановиќ. Се шегуваме на оваа тема, но мислам дека многумина нема да разберат дека станува збор за шега. Целата приказна околу Дончиќ навистина експлодираше“, рече Бресквица во едно интернет-разговорно шоу.
Таа додаде и дека многу ѝ се допаѓа Словенија, од каде што потекнува Дончиќ, па дури рече дека би можела да замисли да живее таму.
Во меѓувреме, корисници на социјалните мрежи забележаа необична активност на кошаркарот на интернет. Според објави што за кратко време ги виделе повеќе од еден милион луѓе, Дончиќ често ги означува како допаднати фотографиите на младата пејачка.
Некои корисници во коментарите ја опишаа Бресквица како модел и тврдат дека кошаркарот редовно реагира на нејзините објави, додека подолго време не покажал никакво јавно внимание кон фотографиите на својата свршеница.
