Славната писателка Џеј Кеј Роулинг, најпозната по тоа што го напиша серијалот „Хари Потер“, тврди дека го победила коронавирусот благодарение на техника која го олеснува дишењето.
Роулинг вели и дека никогаш не се тестирала за тоа дали е позитивна на Ковид 19, но и дека ги чувствувала сите симптоми.
„Во последните две недели ги чувствував сите симптоми на коронавирусот, а мојот лекар и сопруг ме советуваа да започнам да ја практикувам оваа техника на дишење, што навистина ми помогна“, напиша таа на социјалните мрежи и приложи видео во кое доктор од Квинс ја објаснува техниката.
Во видеото, докторот наведува дека е важно техниката да се примени што е можно поскоро, дури и ако не сте заразени.
– Пет пати вдишете длабоко. Држете го здивот пет секунди и на шестата длабоко закашлајте се и покријте ја устата со рака. Повторете го ова а потоа легнете на стомакот. Перницата нека биде пред вас. Дишете длабоко во наредните десет минути – вели докторот во видеото, објаснувајќи ја оваа техника за дишење.
