Људмила Путин е единствената жена која рускиот претседател ѝ ја претстави на јавноста, но во последните години не се споделуваа многу информации за нејзиниот живот. Денес не се знае дали Путин е оженет и колку точно деца има, но светските медиуми објавуваат што изјавила Људмила пред неколку години и како го опишала неговото запросување.
Тие се венчаа во 1983 година и поминаа 30 години заедно, се до разводот во 2013 година.
Во биографијата објавена во 2000 година беа објавени детали за Путин добиени преку разговори со него, но и со негови блиски луѓе. Људмила кажа дека немала високо мислење за тој „лошо облечен маж“ што го запознала пред театар кога била на двоен состанок.
Останале во контакт, а Путин и го дал неговиот телефонски број, што и тогаш било несвојствено за него, бидејќи бил опседнат со приватноста. По три и пол години врска ја запросил, а Људмила го опиша чудниот начин на кој го направил тоа.
„Една ноќ седевме во куќата и тој почна да зборува: „Досега веќе сфати каков човек сум. Генерално, знам дека не сум баш лесен човек“. Тој беше самокритичен и ми објасни дека обично е молчелив и додаде дека е многу ризичен за неговиот животен партнер, и се ми се чинеше дека ги набројува причините за прекин на врската. Рече дека за тие три и пол години би требало да знам каде сакам да продолжи нашата врска. Му реков дека знам. „Ако е така, тогаш сакам да знаеш дека те сакам и предлагам да се венчаме“, раскажа Људмила.
Таа веднаш прифатила да се омажи за него, а деталите од нивниот брак и развод никогаш не се појавија во јавност. Се претпоставува дека пресудни за нивниот развод биле многубројните љубовници на Путин низ годините, но тоа никогаш не беше потврдено. Најпозната од нив е поранешната руска гимнастичарка и златна олимпијка Алина Кабаева, со која рускиот претседател наводно започнал афера уште додека бил во брак. За врската меѓу Путин и Кабаева првпат пишуваше „Московски кореспондент“ во април 2008 година, а набргу потоа магазинот беше мистериозно затворен.
Снимката од нивната изјава од 2013 година кога објавија дека се разведуваат исто така беше предмет на бројни коментари. Многумина забележаа дека Људмила имала чуден став за време на говорот и се чинело дека ја научила изјавата напамет.
„Се разведуваме затоа што ретко се гледаме. Нашите деца пораснаа и имаат сопствени животи. Владимир Владимирович е целосно посветен на својата работа, јас не сакам публицитет и всушност секој од нас води посебен живот”, изјави своевремено сопругата на рускиот претседател.
Путин рекол дека заедно израснале прекрасни деца кои се школувале во Русија, а краткиот разговор со новинарите го завршиле со реченицата: „Да, ова е развод. Цивилизиран развод“.
Во 2016 година светските медиуми објавија дека Људмила се премажила со човек скоро 20 години помлад од неа со кого купиле вила во Франција вредна околу 7,5 милиони долари.
