Штом сонцето почне да заоѓа, христијаните почнуваат да се поздравуваат со поздравот „Бог се јави!“ во очи на празникот.
Според преданието, ноќта спроти Богојавление или Водици се отвора небото и се верува дека секоја желба може да се исполни. Точно на полноќ треба да погледнете во небото и да се замисли желба, која каква и да е мора да биде јасна.
Денес е зимскиот Крстовден, ден кој се слави во пресрет на Богојавление и е прв ден по Божиќ кога православните верници постат.
Нашите предци верувале дека ноќта помеѓу 18-ти и 19-ти јануари, небото се отвора и „Бог се појавува“. Според верувањето, Богојавление – јавувањето на Бога, се случува во глувата доба на предвечерието на празникот, кога во отвореното небо се вкрстуваат ветровите кои дуваат во зима и оние кои дуваат во лето.
Богојавление е денот кога Исус Христос бил крстен во реката Јордан. Кога наполнил 30 години, Исус дошол на реката Јордан за да го крсти Јован Крстител, кој ги подготвувал луѓето за доаѓањето на Месијата и ги крштевал оние кои се покајале на брегот на Јордан.
При крштевањето на Исус Бог се јавил три пати. Тој момент претставува објавување на Богочовекот и воведување на Христос во месијанската мисија.
На овој ден во сите храмови се осветува вода, која народот потоа ја зема во својот дом. Се верува дека водата има лековита моќ и затоа секогаш се држи во куќата покрај икона како спасителски лек.
