Екстремно загрозениот вид птици – калифорниските кондори, може да се размножуваат без парење, покажа истражувањето на научниците од зоолошката градина во Сан Диего.
За време на рутински анализи на биолошките калифорниските кондори во програмата на Зоолошка градина, научниците откриле дека две птици излегле од неоплодени јајца.
„Тоа беше големо изненадување, да бидам искрен. Не го очекувавме тоа“, вели Синтија Штајнер, помошник директор во научниот оддел за зачувување на природата. Штајнер е еден од авторите на студијата објавена неодамна во „Journal of Heredity“, официјалното списание на Американското здружение за генетика.
Научниците потврдија дека секоја од овие птици е генетски поврзана со мајката, но ниту една не е поврзана со мажјакот. Овие две птици се првите примероци на бесполово размножување или партеногенеза потврдени меѓу кондорите, велат од зоолошката градина.
„Станува збор за многу ретко откритие бидејќи феноменот воопшто не е многу познат меѓу птиците. Присутен е кај други видови, влекачи и риби, но кај птиците оваа појава е многу ретка, особено кај дивите видови“, вели Штајнер.
Асексуалното размножување никогаш не е потврдено кај ниеден вид птици кога женката имала пристап до мажјак.
Калифорнискиот кондор е една од најзагрозените птици во светот, но неговата популација расте. Денес има околу 500 живи кондори, од кои 200 се во заробеништво, а 300 во дивината.
Штајнер се надева дека ќе продолжи да ја проучува асексуалната репродукција за да утврди дали тоа ќе се случи кога ќе има повеќе кондори во дивината.
„Ние едноставно сакаме да знаеме колку често овој феномен може да се случи сега кога популацијата се шири наместо да се намалува како што беше пред 80-тите години“, објасни таа.
