Започнавме убава соработка со една врвна готвачка која секое јадење го претвара во магија од вкусови – Теодора Георгиевска.
Оваа извонредна мајсторка и една од највлијателните готвачки на социјалните мрежи кај нас, стои зад бројните рецепти кои ги објавува на профилот „Готвиме со Теа“ – „gotvime.so.tea“.
Денес нашата драга Теа со сите вас споделува еден брз и превкусен рецепт за чизкејк без печење во кој ќе уживаат сите.
Потребни состојки:
- 200 гр бисквити
- 100 гр путер
- 400 гр крем сирење
- 130 гр шеќер во прав
- 300 мл слатка павлака (хопла)
- 400 гр. замрзнато мешано овошје
- 100 гр шеќер
Начин на подготовка:
Бисквитите измелете ги и измешајте ги со стопениот путер. Оваа смеса ставете ја на дното од калапот за торта обложен со округла хартија за печење и убаво натапкајте ја. Овошјето ставете го во тенџерече заедно со шеќерот и оставете го да врие на тивок оган со повремено мешање околу 15 минути, за да испари течноста.
Во длабок сад со миксер измешајте ги крем сирењето и шеќерот и потоа додадете ја слатката павлака и мешајте уште 5 минути да се згусне. Оваа смеса распоредете ја врз бисквитот и ставете да се лади во фрижидер најмалку 3-4 часа. На крај ставете го изладеното сварено овошје и уживајте во вкусот!
На здравје!
