На социјалната мрежа Фејсбук е основана група „Спасете го пантерот“ со единствена цел да се поттикне хумано заловување на големата мачка и сместување во живеалиште какво што ѝ прилега.
„Оваа група е формирана со цел да собере што повеќе истомисленици за да апелира до надлежните државни институции, ловните друштва, министерствата и локалните самоуправи, како и до сите други професионални членови на јавноста, дека црниот пантер не треба да биде убиен, туку да се најде решение за негово хумано фаќање и поставување во средина каква што заслужува едно вакво убаво животно“, пишува на Фејсбук групата која од час во час добива се повеќе приврзаници кои молат пантерот да биде спасен.
Некои информации што ги објавуваат медиумите во соседството велат дека грациозната мачка се наоѓа во шумата кај Апатин. На новоформираната група е објавена и фотографија на која се гледа како двајца ловци се фотографирани покрај неподвижен пантер, но како што велат поддржувачите на групата за среќа станува збор за лажна вест.
