Состојки:
300 грама брашно
170 грама маргарин што претходно бил на собна температура
100 грама шеќер
50 грама мед
1 лажичка сода-бикарбона
малку сол
малку цимет
кора од лимон или портокал
2 лажички екстракт од ванила
4 жолчки
Полнење:
400 грам суви смокви
80 грама пире од јаболка
50 грама мед
малку цимет
Подготовка:
Во поголем сад ставете ги омекнатиот маргарин, шеќерот и медот, ренданата кора од лимонот или портокалот (по ваша желба), солта, циметот и екстрактот од ванила. Сите состојки убаво измешајте ги со миксер за да можат убаво да се соединат. Потоа, во убаво изматената смеса една по една додавајте ги жолчките и постојано мешајте додека сите жолчки убаво не се соединат со претходно подготвената смеса.
Сега ставете го брашното што претходно убаво сте го просеале заедно со сода-бикарбона. Додека го ставате брашното во другите состојки, внимателно мешајте со миксер, но на најмала брзина. Кога ќе го ставите целото брашно, тогаш исклучете го миксерот и почнете да ја подготвувате смесата со дрвена лажица. Потребно е најмалку две-три минути да ја мешате смесата со лажицата за да се соедини убаво.
Тестото кое ќе го добиете треба да биде многу меко и затоа нема да треба да додавате повеќе брашно.
Вака подготвеното тесто, поделете го на четири еднакви делови, а секое делче со помош на стреч фолија или со хартија за печење и сукало, нежно исукајте ги на што е можно поголема коричка.
Коричките ставете ги во стреч фолија и оставете ги да отстојат и убаво да се изладат во фрижидер најмалку два часа.
Додека чекате да помине потребното време за разладување на тестото, почнете со подготовка на филот. Во сад ставете ги исечканите суви смокви, медот и пирето од јаболка и убаво со рачен миксер изметете ја целата смеса.
Потоа ставете ја вака добиената смеса во вреќичка за украсување за да можете полесно да ги филувате штрудлите.
Сега извадете го тестото од фрижидер и исечете го на соодветни лентички односно тие треба да бидат дебели 2 милиметри, а долги и широки 8 сантиметри.
Потоа во должината на секоја штрудличка ставете со помош на шприцот по малку од претходно подготвениот фил. Преклопете го едниот крај на тестото со другиот и формирајте штрудла.
Повторувајте ја постапката додека не се потроши целото тесто и целиот фил.
Подготвените штрудлички ставете ги да отстојат во фрижидер околу 1 час.
По истекот на времето поминато во фрижидер, ставете ги да се печат во претходно загреана рерна на 180 степени околу 12 минути.
