Најспектакуларниот и воедно најзначаен спортски настан во Америка – финалето на американскиот фудбал, го обележаа и настапите на латино дивите Џенифер Лопез и Шакира.
Иако двете пејачки настапија без никаков надомест, тие дадоа сè од себе за максимално да се подготват и да изгледаат феноменално за време на нивниот перформанс.
Скот Барнс, мејкап-артистот на Лопез, искуството на шминкањето на Џеј Ло за Супербол го опишува како „лудо“. Барнс бил инспириран од фотосесиите на Питер Линдберг, кој во деведесеттите работел со Линда Еванџелиста и Кристи Тарлингтон, пренесува Индепендент.
Тој открива дека прво ја подготвувал Џеј Ло во нејзиниот дом, каде што пристигнал во 10 часот наутро.
„Таа правеше проба, ние се подготвувавме. Потоа почнавме со ноктите, косата, и на крај шминката.
Но уште не бев готов. Ја напуштив куќата околу 15 часот со полициска придружба. Да, со полициска придружба.“, објаснува Барнс.
Барнс продолжил со шминкањето на Лопез во 16.30 часот сè до 17.30, само два часа пред започнување на шоуто.
Очигледно Барнс добро си ја завршил работата, бидејќи Џенифер Лопез изгледаше совршено на сцената.
