Мозокот изложен на никотин почнува да го толкува пушењето како корисна активност. Никотинот користи „потсвесен“ механизам за учење, кој ги поврзува ситуациите од околината и соодветната реакција.
Истражувањата покажуваат дека никотинот, состојка во цигарите што предизвикува зависност, го „мами“ мозокот. Ова може да објасни зошто поранешни пушачи имаат желба да запалат цигара кога се во бар или после оброк.
Студија спроведена од истражувачи од Медицинскиот колеџ Бејлор сугерира дека нашиот мозок функционира поврзувајќи ги настаните од околината со реакции, па затоа емитува „сигнал за награда“ кога ќе се однесуваме на начин што е корисен за нас, вели д-р Џон Дени, професор по неврологија.
„Никотинот ја презема контролата над овој механизам за потсвесно учење, па мозокот го толкува пушењето како позитивно дејство“, изјави д-р Џон.
Тој објаснува дека поради тоа, одредени настани од околината можат да предизвикаат желба за пушење. Алкохолот, оброк со пријатели и возењето во автомобил може да станат сигнал што предизвикува пушење.
Истражувањето испитувало какво влијание има никотинот и каква активност предизвикува во мозокот на глувци. На глувците им било дозволено да шетаат низ две комори. Во едната комора биле изложени на никотин, а во другатa имало солен раствор.
Научниците следеле колку долго глувците престојувале во коморите, како и мозочната активност во хипокампусот, дел од мозокот каде се создаваат нови спомени.
„Активноста во мозокот беше неверојатна… Во споредба со солен раствор, никотинот ги зајакнува врските помеѓу невроните до 200 проценти. Тоа зајакнување на врските е показател за создавање нови сеќавања“, вели д-р Дани.
Тој објаснува дека разбирањето на механизмите со кои се создаваат спомените може да помогне во подобро разбирање и наоѓање лек за болести како што се Алцхајмер или Паркинсон.
Преземено од Слободен Печат.
