Во Велика Британија е идентификувана нова варијанта на корона вирусот, но експертите велат дека засега нема причина за тревога.
Варијантата XE е комбинација од омикронската варијанта BA.1 и нејзината подваријанта BA.2. Овој тип на комбинација е познат како рекомбинантна варијанта.
Експертите за јавно здравје велат дека рекомбинантните варијанти се многу чести и се појавуваат ненадејно.
„Навистина нема причина за грижа во моментов. Веќе имавме рекомбинантни варијанти и се покажа дека ниту една не е варијанта за загриженост.“, рече епидемиологот Џон Браунштајн.
Раните индикации од Велика Британија сугерираат дека варијантата XE може да биде попренослива од BA.1, но Светската здравствена организација забележува дека се потребни многу повеќе истражувања.
Во меѓувреме, XE претставува помалку од еден процент од случаите во Обединетото Кралство кои биле подложени на геномско секвенционирање и нема докази што сугерираат дека оваа варијанта може да ги избегне вакцините, да предизвика потежок облик на болеста или да биде посмртоносна.
Најчестите знаци на омикрон
Откако сојот омикрон почна да циркулира кај населението, пријавени се различни симптоми кои може да укажуваат на неговото присуство. Кивање, мачнини, болки во мускулите, кашлица и губење на апетит се само некои од знаците кои се појавуваат заедно и поради кои се препорачува да се направи тест за корона вирусот.
Британската национална здравствена служба издвојува девет симптоми за новиот потсој на коронавирусот:
-отежнато дишење/краток здив
-чувство на умор и истоштеност
-болки во телото
-главоболки
-суво грло
-затнат нос
-губење на апетитот
-дијареа
-мачнина
Д-р Константина Станковиќ од Универзитетот Стенфорд во САД изјави дека болката во увото станува чест симптом на инфекција со новиот корона вирус.
– Кај некои од нашите пациенти губењето на слухот беше единствениот знак за ковид. Болката е често поврзана со ѕвонење во ушите – откри д-р Станковиќ.
