Вуди Ален стави до знаење дека нема да се повлече од киното, како што некои медиуми протолкувале според негови реченици извадени од контекст во интервју дадено во последните денови за шпанскиот весник „Ла Вангардија“, пишуваат италијанските весници.
Во изјавата испратена до IndieWire, портпаролот рече дека „[Ален] нема намера да се пензионира во моментов и е многу возбуден што ќе биде во Париз за да го снима својот нов филм, кој ќе биде негов 50-ти“.
Веста за можното пензионирање на Ален се родила од неколку реченици изговорени од 86-годишниот режисер за време на интервјуто за „La Vanguardia“ и веднаш одекна на бројни портали и весници.
Зборувајќи за филмот со наслов „Wasp 22“, сместен во Париз, Ален рече: „Мојот следен филм ќе биде број 50, мислам дека е добро време да прекинам“; тој потоа додаде: „Мојата идеја, во принцип, е да престанам да снимам филмови и да се концентрирам на пишувањето“.
Сепак, „Вангардија“ избра прилично сув и веројатно погрешен наслов: „Ќе го снимам следниот филм, а потоа ќе се повлечам да пишувам романи“, што сугерира дека „Wasp 22“ ќе биде неговиот последен филм.
Во изјавата, портпаролот појасни дека „Вуди Ален никогаш не рекол дека сака да се пензионира, ниту пак дека сака да напише нов роман. Тој рече дека не му се допаѓа идејата да прави филмови кои завршуваат директно или многу брзо на платформите за стриминг, бидејќи е голем вљубеник во кино -искуството“.
