Пејачот Димитар Андоновски вчера имаше два убави поводи за славење – го прослави својот 41. роденден и 11-годишнината од бракот со сопругата Христина. По тој повод, тој сподели емотивна порака посветена на семејството, здравјето и животните вредности кои, како што вели, со годините сè повеќе ги цени.
„Денес славам два убави и за мене многу значајни настани. 41 година од мојот живот и 11 години брак со мојата Христина.
Му благодарам на Бога за сите убавини што ми ги дал низ годините, за моето семејство и најмногу за тоа што сме живи и здрави. Животот оди напред, секогаш со Божја промисла. Со годините сè повеќе сфаќам дека не ми треба многу… Само мир, здравје и моите најблиски да бидат покрај мене. Сè друго си доаѓа и си заминува.
Денес добив навистина многу пораки и повици. На некои сè уште не успеав на сите да вратам, но ќе го направам тоа.
Ви благодарам од срце на сите што ми го честитавте роденденот, што се сетивте на мене и што со вашите убави зборови ми го разубавивте денот.
Да сме живи, здрави и да се радуваме на уште многу убави моменти заедно!”, напиша Андоновски.
Роденденот на пејачот го одбележа и неговата сопруга Христина, која сподели семејна фотографија на која позираат заедно со нивните два сина, Михаил и Гаврил, и кратко му порача: „Среќен роденден”.
Димитар и Христина се во брак од 2015 година, а нивната љубовна приказна низ годините ја надградија со семејството. Тие се родители на Михаил и Гаврил, а помалиот син Гаврил се роди во јануари 2022 година.
Андоновски и претходно зборувал за важноста на семејството и за поддршката што ја добива од Христина, која по професија е професорка по историја. Во интервју за „Слободен печат” раскажа дека двајцата низ годините научиле заеднички да ги надминуваат предизвиците, а за синовите Михаил и Гаврил истакна дека неговата најголема желба е да израснат во добри, чесни, воспитани и, пред сè, среќни луѓе.
