Пекарниците се вистинска душа на градот, вели блогерката Софија Јаневска. Париз е една од оние дестинации на кои таа повторно се навраќа. „Има многу причини зошто го сакам Париз. Градот ме обзема со својата магична привлечност“.
Зошто Париз?
– Париз е дестинација која одговара за различен вид туризам (историја, култура, гастрономија, мода, забава, авантура). Може да се релаксирате, купувате, истражувате, едуцирате и забавувате, сè е лесно достапно… Една од најубавите работи кои сакам да ги правам во Париз е шетање по малите улички и пиење кафе во преубавите кафулиња кои ги има буквално на секој агол. Мои омилени места се Cafe de Flore Le Deux Maggots, Cafe Marly. Причина зошто доаѓам во Париз е прекрасната архитектура, изгледот на зградите, обликот на крововите и прекрасните француски балкони кои даваат поттик на мојата имагинација. А мостовите на Сена се фасцинантни, посебно навечер доколку испланирате ноќно крстарење со брод. Ова се дефинитивно некои од причините зошто го сакам Париз и постојано се враќам во овој прекрасен град.
Во што најмногу уживаше?
– Има многу ресторани и бистроа кои ги посетувам, а омилени ми се Pink Mama и Giraffe. Но, исто така може да се најде превкусна храна во малите кафулиња и места за „take away“. Тешко е накратко да се опише чувството да си во Париз на некој што сè уште не го посетил овој магичен град. Ова чувство кое е комбинација на среќа, мириси, вкусови, енергија, историја, култура и задоволства е причина број еден зошто го сакам Париз. Тука имам чувство дека можам да уживам во животот и убавите нешта, едноставно joie de vivre!
Кои се местата кои задолжително треба да се посетат во Париз?
– Париз е познат како „Град на светлината“ и „Град на љубовта“ и навистина е така. Од светлата на Ајфелова кула, излозите на луксузните продавници, огнометот во Дизниленд, па сè до заљубените парови покрај Сена и парковите, сето тоа е потвда за ваквата импресија за Париз. Градот за мене е најубав во пролет, кога е преплавен со расцветани јапонски цреши, јорговани и лалиња и секогаш ме обзема нереално чувство на среќа.Температурата е околу 15-20’С, насекаде се чувствува мирис на свежо пециво и цвеќиња, па можам да го истражувам градот буквално цел ден без да се изморам од таа убавина. Мојот впечаток е дека јавниот превоз е одлично организиран и низ Париз можеш лесно да се движиш со метро или автобус, а помладите најчесто возат велосипеди и електрични тротинети кои се изнајмуваат на многу локации. Јас преферирам хотел, но и „Airbnb“ е супер опција.
Една од причините поради кои го сакам Париз се музеите. Louvre и Mузејот d’Orsay се светски познати по извонредните уметнички дела кои го одземаат здивот и потребни се денови за да се посетат сите поставки. Исто така Париз има прекрасни паркови и градини, каде може со часови да шетате низ најубавите цвеќиња и дрва. Моите омилени места се Jardin des Tuileries, Le Jardin du Luxemburg, каде може да си направите пикник со малку француско сирење и вино. Да, друга причина зошто го сакам Париз е дефинитивно храната и виното. Кроасаните и багетите ми се омилени, а со чаша добро вино мора да се пробаат и француските сирења.
Како и каде можеш да ја почувствуваш душата на еден народ?
– Вистинската душа на Париз ќе ја запознаете доколку направите гастрономска тура низ градот и барем делумно ги откриете француските кулинарски традиции. Парижаните се горди на своите кафе-ресторани, но мислам дека пекарниците се вистинската душа на градот.
Модата и убавината низ улиците на Париз?
– Париз е светски центар на модата и таму се диктираат најновите модни трендови за претстојната сезона. Париз е седиште на најголем број модни брендови и дизајнери како Louis Vuitton, Chanel, Dior, Hermès. Во Париз се одржува Париската модна недеа, каде се презентираат најновите модни трендови за претстојната сезона, а дел од светските модни дизајнери се лоцирани и креираат од Париз, како Vuitton, Balenciaga, Yves Saint Laurent, Chanel, Dior, и др. Концептот на „Haute couture” е создаден во Париз.
Парижанките се љубители на модата, но не и робуваат на неа. Се облекуваат елегантно, но доста минималистички. Избегнуваат јаки бои и воопшто не се екстравагантни.
Модните ентузијасти може да прошетаат по неколку улици каде се лоцирани светски познати брендови кои се олицетворение на парискиот стил, пред се квартот Faubourg Saint-Honoré, улиците помеѓу Louvre и Tulliers.
Задолжително посетете ја Галеријата Лафајет и уживајте во прекрасната атмосфера, балконите, покривот со поглед на целиот град (најдобро на залез на сонцето), и воедно во шопинг или разгледување на бескрајната понуда од луксузни брендови, квалитетни чанти, луксузни парчиња облека и парфеми.
