– За време на викендот како што и најавивме, под влијание на влажна и нестабилна воздушна маса, времето во Македонија ќе биде особено нестабилно на повеќе места со пороен дожд, грмежи и засилен ветер. Локално ќе има појава на НЕВРЕМЕ, проследено со интензивен пороен дожд, силен ветер, силни електрични празнења и со појава на град. Во почетокот од следната недела ќе имаме постабилно и посончево време, иако во попладневните часови не се исклучува можноста за изолирана појава на нестабилност. Што се однесува до температурите, тие во следните денови ќе се намалат за неколку степени и максималните дневни температури ќе се искачуваат во интервалот од 26 до 33 степени, додека уште малку пониски температури ќе имаме во недела, и тогаш масималните температури ќе се искачуваат во интервалот од 24 до 30 степени. И во Скопскиот регион за време на овој викенд времето ќе биде особено нестабилно со локална појава на пороен дожд, грмежи и засилен ветер. Во делови од котлината ќе има условиза појава на КРАТКОТРАЈНО НЕВРЕМЕ – вели метео прогнозерот Славчо Попоски.
Според Попоски, во почетокот од следната недела пак времето ќе биде постабилно и посончево, иако во попладневните часови има мали услови за појава на ретка нестабилност. Температурите ќе се искачуваат во интервалот помеѓу 28 и 33 степени.
ПРЕДУПРЕДУВАЊЕ: Со оглед на тоа дека понатаму Атмосферата ќе биде МНОГУ НЕСТАБИЛНА, во случај на појава на електрични празнења, да не се претстојува на отворен простор и под осамени дрвја, исто така во случај на појава на силен ветер, граѓаните своите автомобили да не ги ставаат во близина на дрвја за да не дојде до несакана штета. Исто така во случај на електрични празнења, овчарите своите стада да ги делат во помали групи, со цел да ги заштитат.
