Топ-моделот Катарина Ивановска престојува во италијанскиот регион Пуља, каде што работните обврски ги спои со уживање покрај море.
Ивановска објави серија фотографии од живописниот југ на Италија, а на дел од нив може да се види и атмосферата од снимањето. На една од фотографиите таа позира пред морето додека зад камерата е тимот со кој работи.
„Малку работа, малку Пуља“, напиша таа покрај објавата.
Интересен детаљ е и изборот на музика со која ја придружи објавата, песната „Кукла жива“ на нејзината блиска пријателка Тамара Тодевска.
Катарина и Тамара со години не го кријат своето блиско пријателство и често споделуваат заеднички моменти, патувања и дружења со своите деца.
Колку се блиски покажа Тамара минатата година, кога за роденденот на Катарина објави серија нивни заеднички фотографии и ја нарече „супер мајка и супер другарка“.
Ивановска, која зад себе има богата интернационална манекенска кариера, уште како средношколка заминала во Њујорк и соработувала со познати светски модни куќи и дизајнери. Денес, покрај професионалните ангажмани, голем дел од времето им го посветува на своите деца Вања и Кира.
Токму за балансот меѓу кариерата и мајчинството таа во интервју за „Слободен печат“ искрено рече:
„Јас свесно жртвував највозбудлив дел од младоста за професијата и затоа решив дека нема да го пропуштам мајчинството и времето со моите деца.“
Во друго интервју Ивановска зборуваше и за она што ѝ е важно во животот, велејќи дека е среќна и дека не познава човек кој може без љубов, без разлика за каква љубов станува збор.
За престојот во Пуља, судејќи според фотографиите, Катарина овојпат успеала да го најде токму тој баланс.
View this post on Instagram
