Српската репрезентација по поразот од Бразил (0:2) предизвика скандал поради знамето во соблекувалната на тимот.
На знамето е прикажана мапа каде Косово е вклучено во Србија, а слоганот гласи: „Не се откажувај“. Знамето висело над дресовите на дефанзивецот на Вердер, Милош Вељковиќ и напаѓачот на ПАОК, Андрија Живковиќ.
Појавата на знамето веднаш предизвика реакција на Косово, каде локалните власти со жалба апелираа до ФИФА. Косово се приклучи на ФИФА и УЕФА во 2016 година и како членка на организациите бара постапка против репрезентацијата на Србија.
„Ваквиот шовинистички чин нема место на спортските настани, а уште повеќе на местата каде што се случува најголемиот фудбалски настан во светот. Неприфатливо е овој чин да се премолчи. Силно бараме ФИФА строго да ги спроведе своите правила и да ја казни Српската фудбалска федерација за овој агресивен чин, кој е спротивен на вредностите што ги емитува фудбалот“, се вели во соопштението на Фудбалската федерација на Косово.
Косовскиот министер за спорт Хајрула Чеку веќе јавно го осуди случајот со знамето во српската соблекувална, и ја повика ФИФА да дејствува.
„Срамни слики од српската соблекувална на кои се прикажуваат омраза, ксенофобични и геноцидни пораки против Косово додека се користи Светското првенство. Очекуваме конкретни активности од ФИФА, со оглед на тоа што ФФК е полноправна членка на ФИФА и УЕФА“, рече Чеку.
ФИФА се уште не реагирала на инцидентот.
