Ви ги отвораме вратите на импресивниот двор на Евица и Благе Додевски. Евица е домаќинка, невработена, а Благе по професија е керамичар, со одгледување на цвеќиња се занимаваат откако живеат во семејната куќа во населба Ајдучка чешма во Куманово.
Дворот се простира на 500 метри квадратни и навистина плени со изгледот, среденоста и декоративните елементи. Има бројни видови на цвеќиња, но доминираат леандрите, розите, далиите, сарделите, висечките сардели, петуниите…Но, ако Евица и Благе треба да изберат кои им се најомилени цвеќиња, велат дека тоа се леандрите и розите кои ги имаат во најразлични бои и нијанси.
– Одгледувањето на цвеќиња бара секојдневна посветеност и ангажираност, и потребна е многу љубов за нивно одгледување – ни раскажуваат нашите домаќини.
Се согласуваме со нив – предизвик е да се има убаво среден двор со многу цвеќиња, покрај фонтаната која го разубавува дворот и изработките од камења.
Имено, Благе се занимава околу десет години со изработки на црквички, а идеи за нивно изработување добива од вистинските цркви. Досега овој господин има изработено бројни црквички кои сам ги осмислува, но изработува и по желба на купувачите.
Покрај изработка на црквички, Благе изработува и фонтани, огради од камен, украсни селски куќи од камен, воденици, саксии од камен, и различни други изработеки од камен.
Импресионирани од дворот на нашите љубезни и вредни соговорници, убави луѓе како и нивниот двор, ги прашуваме за совет што би го споделиле со оние кои допрва сакаат да почнат да се занимаваат со градинарство и нега на цвеќе.
– Сите кои сакаат да се занимаваат со цвеќиња и да имаат убаво среден двор, треба да имаат љубов кон цвеќињата, а со тек на време ќе научат и кои цвеќиња какви услови бараат. Идеи за украсување на дворот може да добијат од многу портали и Интернет страници, меѓу кои и од Фејсбук групата Дворчето, како и сами да ја покажат својата креативност и умешност, – ни одговараат домаќините.
Инаку, со Евица и Благе стапивме во контакт преку нивната ќерка Сања Додевска Спасовка, која членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
Уживајте во прекрасната фотогалерија.
Фото – приватна архива
