Игор Џамбазов секогаш избира симболични датуми за промоции, концерти и важни настанина кои се појавува. Сношти, на 4 јули, заедно со музичарот Игор Атанасовски (Гуру Харе) го промовираа нивниот заеднички албум „Првите триесет“.
Игор настанот го направи троен, освен на албумот, ова беше и промоција на 20. издание на неговата најпродавана книга „Гол човек“, како и на маичките со стиховите од нивните песни. Локалот беше преполн, а Џамбазов и Харе, кои се другари повеќе од 30 години, на гостите им го потпишуваа новиот албум на кој има и добро познати хитови.
-Добредојдовте на 4-ти јули. Во наше време, тоој ден беше познат како ден на борецот. А, ние сме познати како единствени боци против кичот, шундот, турбо-фолкот и плејбекот. Добредојдовте истомисленици. 4-ти јули исто така е и Ден на независноста на земјата каде што е измислен блузот. И 4 јули, роденден на многу од гостите овде вечерва. Сите сте правени во ноември, леле, исто како мене“, рече Џамбазов кој на 15 јули ќе наполни 60 години и раскажа уште една оригинална приказна.
-Една денеска ми напишала на Инстаграм. Оди си бе, да те нема, доста од тебе. Па дајте на ова младиве остапате простор. И со Харе се договоривме: Од утре, на младите им оставаме, што не значи дека ние ќе престанеме да свириме, ама еве, од утре на младите им оставаме. Абе млади, кај и да е, староста утре ќе дојде и кај вас“, рече Игор. Со Харе, во живо ни пренесоа дел од својот блуз кој повеќе од три децении е актуелен кај народот, а многу од нивните песни имаат свои преработки од помлади музичари. Џамбазов во свој стил се пошегува дека има многу жени во публиката и искоментира:
-Жени, каде бевте бе вие пред 3-4 години? Лани останав сирак, оваа година останав ерген, другата година изгледа нормален ќе останам“, рече Игор и кажа дека тој и Харе самите си се спонзори на албумот.
-Дечки, „Првите 30“ се вика нашиот заеднички албум, имаме многу пријатели што го помогнаа. Ние сме си спонзори, Харе и јас, и нашиот менаџер Васко Павлески, а „Слободен печат“ е нашиот медиумски спонзор. Ако не знааете што е менаџер, сега ќе ви кажам. Тоа е оној човек- чичко што никогаш не ја работел твојата работа, ама ја знае десет пати подобро од тебе. Албумот завршува со една песна што се вика „Три еспреса и Бон аква“ отсвирена во живо во 2001 година, на летниот џез фестивал во Куманово“, рече Џамбазов . Харе пак кажа еден интересен и важен феномен. Пијалокот за кој пеат веќе го нема, а тие двајца се уште овде и според убавата атмосфера која ја направија пред публиката сношти, ќе бидат уште долго.
На промоцијата дојдоа многу нивни пријатели: Весна Петрушевска, Тони Михаловски, Лила Стојановска, а меѓу гостите беше и српскиот актер Милан Калиниќ. Диџеј Зоки Бејбе направи убава забава за гостите во „Beer Garden“ пред Игор и Харе.
Фото – Драган Митревски
