Ни беше чест и задоволство да се подружиме и поразговараме со Васка Трајкова, доктор по медицина, но и „докторка“ за одгледување цвеќиња – хоби со кое се занимава од рана возраст, а активно во дворот во село Мокрино веќе цели 12 години.
– Дворчето е 400м2 во семејната куќа (сега наша викендица) на мојто сопруг Мирчо, во селото Мокрино под бујната и мокра планина Беласица, тој родното огниште го памети по овој двор и цвеќињата одгледувани во него со генерации – ни открива Васка.
Во дворот има повеќе децениски цвеќиња уште од свекрвата на Васка, како зумбули и нарциси, кои – како што ни опишува нашата соговорничка – секоја пролет повторно излегуваат и со тоа ги навраќат спомените на едно безгрижно детство.
– Јаворот на влезната порта е стогодишно дрво кое како верен чувар на времето неуморно ни дарува сенка. Убавината на дворот е заслуга на сопругот, по професија зем.инженер, тој е одговорен за сезонското цвеќе, сарделите се негово хоби, а мои се секулентите и кактусите(понезахтевните) – ни раскажува Васка.
Според Васка, дворот не е премногу захтевен, но бара секојдневно одржување по минимум половина час.
– Покрај цвеќињата имаме и ароматични билки – нане, мента, рузмарин, мајоран, жалфија, маточина и лаванда која мојата ќерка посебно ја обожава, а од цвеќиња на сонце од нашиот двор би ги издвоила розите, секулентите и кактусите кои редовно цветат овде; балконско цвеќе пак, сарделите – ни набројува таа и додава дека најголем предизвик кога дворот е во прашање е одржување на балнс и хармонија помеѓу имање миленичиња (маче и желки) и растенија.
Совет за оние кои сакат да почнат со одгледување на цвеќиња?
– Би било убаво да почнат со немногу захтевни, доколку немаат доволно време секој ден да се посветат на ова прекрасно хоби, како стартни цвеќиња би ги посочила секулентите и ранопролетните цвеќиња кои се повеќегодишни и излегувааат сами – советува Васка.
Фото – приватна архива