– Во текот на оваа ноќ времето ќе биде претежно ведро и студено со мала до умерена локална облачност. Температурите насекаде ќе се спуштаат под нулата и до утре изутрина истите ќе се спуштаат во интервалот од -7 до 0 степени, најавува нашиот метео прогнозер Славчо Попоски.
Според Попоски, утре времето ќе се задржи претежно стабилно и суво, односно сончево со умерена локална облачност. Ќе дува слаб до умерен ветер од јужен и од југоисточен правец. Температурите ќе се искачуваат во интервалот од 4 до 12 степени. Нов влажен бран се очекува во петок и за време на викендот, и истиот ќе услови нови повремени врнежи од дожд и снег на планините. Во петок ќе дува умерен, повремено засилен ветер од јужен правец, додека температурите ќе се искачуваат во интервалот од 6 до 13 степени.
– За време на викендот пак температурите ќе бидат пониски и ќе се искачуваат во интервалот од 4 до 10 степени. Исто така за време на викендот ќе дува и слаб до умерен ветер од северен правец, кој Долж Повардарието повремено ќе засилува на интензитет. И во Скопскиот регион утре ќе имаме претежно стабилно и суво време, додека од петок па за време на викендот ќе има повеќе облачност, но и услови за повремени врнежи од дожд. Температурите ќе се искачуваат во интервалот помеѓу 9 и 13 степени.
