Ништо повкусно од сочен свински бут прелиен со глазура од сенф и мед. Љубителите на месо ќе бидат воодушевени од овој рецепт кој е совршен за новогодишните и божиќните празници. Постапката на подготовка е мошне лесна, а финалниот резулат е експлозија од вкусови која се топи во уста.
Потребни состојки:
4 кг парче од свински бут
Мелен црн пипер по вкус
2 лажици сенф
Масло за јадење
2 лажички мешан сув зеленчук
За глазурата:
1 лажица сенф
1 лажица мед
Сол и мелен црн пипер по вкус
3 лажици масло за јадење
3 лажици вода
1 лажичка оцет
Прилог:
3 компири
3 моркови
1 страк праз
1 црвен кромид
Сол и мелен црн пипер по вкус
Масло за јадење
За сосот:
Течноста од тавата каде што се готвело месото
1 лажичка брашно
2 лажици масло за јадење
50 мл бело вино
Начин на подготовка:
Најпрво зачинете го парчето свински бут со мелен црн пипер и мешан сув зеленчук. Потоа премачкајте го со сенф и полејте малку масло за јадење. Префрлете го парчето месо во тава за печење обложена со хартија за печење. Превиткајте ги сите страни од тавчето со алуминиумска фолија и печете во загреана рерна на 150 степени околу 3-4 часа. Во меѓувреме подгответе ја глазурата. Во длабок сад измешајте ги сенфот, медот, солта и мелениот бибер, маслото за јадење водата и оцетот.
Потоа, отстранете го тавчето од рерна и тргнете го парчето фолија.
Премачкајте го парчето со месо со глазурата и вратете во загреана рерна сега на 180 степени и печете околу 30 минути додека не добие убава сјајна златно-кафена боја.
Кога бутот ќе биде готов покријте го со парче алуминиумска фолија и оставете да се излади 20 минути.
Во тава на оган загрејте масло и пропржете го брашното. Полејте од течноста во која се готвело месото и бело вино. Матете со жица за матење додека целата смеса не се соедини и не стане густа како сосот.
За тоа време во тавче обложено со хартија за печење, ставете ги исецканите компири, моркови, праз и кромид. Зачинете со сол и мелен црн пипер по вкус и полејте со масло за јадење. Печете во загреана рерна на 180 степени околу 30-40 минути. На половина од печењето извадете го тавчето од рерна и промешајте ги сите состојки за рамномерно да се испечат. Послужете со сосот и печениот зеленчук.
Комбинирајте го ова превкусно месо со чаша квалитетно црвено вино и во целост препуштете му се на задоволството.
За правилно да го подготвите овој рецепт можете да го погледнете во видеото.
