За првпат ја видовме на „Макфест“ во 2019 година, но вистински публиката ја забележа и слушна кога ја претстави песната „Некогаш ќе помине“. Продолжи со „Кој е сега крив“, а додека се подготвува за настапот на Макфест, Лара Иванова ни открива детали за новата песна, подготовката, емоциите, конкуренцијата…
Како се подготвуваш за Макфест? Има ли возбуда, емоција, нетрпение…
-Секогаш има возбуда, емоција и нетрпение кога се подготвувам за некој настап, посебно кога станува збор за настап на нашиот најреномиран фестивал Макфест.
Со која композиција ќе се претставиш на публиката? Каква е песната?
-Композицијата носи наслов „Душа”, и е прекрасна, емотивна балада со извонреден текст.
Какви се твоите очекувања и за настапот и за фестивалот?
-Немам посебни очекувања во однос на тоа дали композицијата ќе освои некаква награда, затоа што најголема награда за мене е песната да и’ се допадне на публиката и за мене тоа е најважно.
Како ќе изгледа твојот настап, сама на сцена или со некаква сценска точка?
-Не, нема да има сценска точка, но јас на сцената никогаш не сум сама, секогаш се тука моите емоции кои го надополнуваат мојот настап.
Кој ќе се погрижи за твојот изглед?
-Мојот изглед им го доверив на Викторија Бурсак и Даниел Николовски, а на сцената ќе настапам во прекрасна креација на нашиот познат дизајнер Занов.
Какво е чувството да учествуваш на најпрестижниот фестивал? Чувствуваш ли некој дополнителен притисок и одговорност?
Ова ќе биде мој трет настап на Макфест, а тоа зборува колку ми значат настапите на овој фестивал. Секако чувствувам одговорност, бидејќи јас мојата музичка кариера ја започнав токму на Макфест, а тоа значи дека секогаш давам се’ од себе да се претставам во најдобро светло и искрено да ја пренесам емоцијата, а публиката знае тоа да го награди.
Каква е конкуренцијата оваа година?
-Секоја година на фестивалот Макфест настапуваат многу реномирани изведувачи со квалитетни композиции, но и млади и надежни таленти, па очекувам и оваа година да биде така.
