Македонската фолк естрада е во шок по веста дека починал младиот пејач Виктор Барбутов.
– Сабајлево почина фолк пејачот на групата „Амајлија“ од Скопје Виктор Барбутов. Како што дознаваме пред тоа немал здраствени проблеми, ноќва се пожалил на главоболки и бил однесен на брза помош каде и починал од мозочен удар, објави порталот Естрада плус.
На социјалните мрежи неговите пријатели и колеги немаат зборови за утеха по прерано згаснатиот живот.
„Најдоброто младо и секогаш насмеано момче, почитуван и сакан и од ученици и од колеги. Тивко згасна колега , ќе недостасуваш многу , твојата насмевка , позитивна енергија и твојот убав збор. Вечно ќе те паметам , почивај во мир“, пишува во сочувството што го изразуваат пријатели на младиот пејач.
Виктор беше и член на поранешната група „Фантазија“ со која ја испеја песната „Земјо пресвета“.
„Можеби најдобриот колега што сум го имала (со уште 2, 3 исклучоци плус). Скромен, а голем. Добар збор за секого, утеха, совет. Уште една душа планина, на небото замина. Зошто баш тој, зошто кога беше здрав, без лоши навики и пороци? Прашања што секогаш остануваат неодговорени кога некој нė напушта од овој свет. Ама никако да научиме дека 5 минути трае животов и дека сė што се бара од нас е да бидеме луѓе, онакви какви што сме се родиле. А, по пат, многумина се претвораат во ѕверови. Виктор замина како ангел. Сочувство до семејството и блиските“, пишува Мими Стојановска.
