Пејачот Владан Савиќ, познат како Влада од „Магла бенд“, во емисијата „На терапија“ отворено прозборе за тешките моменти од детството, борбата со депресијата и деновите кога побарал стручна помош.
Неговите родители дошле од југот на Србија во Белград без ништо и работеле деноноќно за да му обезбедат сè на семејството. Но, поради тоа, пејачот од детството носи длабока траума.
„Татко ми толку многу работеше што неколку пати забораваше да ме земе од градинка. Можете ли да замислите каква траума е тоа за шестгодишно дете? Тоа е како кога ќе оставите куче, тоа мисли дека никогаш повеќе нема да се вратите. Седев со воспитувачките во дворот и се прашував дали татко ми е изопшто жив и дали ќе дојде по мене. Иако тој е најдобриот татко на светот, за мене тој период беше исклучително стресен“, се присети Влада.
Покрај детските стравови, пејачот отворено зборуваше и за подоцнежните животни удари — тешкиот развод од поранешната партнерка Јована, влегувањето во депресија и порокот со алкохолот, кои го натерале да побара помош од психијатар и да започне со соодветна терапија.
За среќа, по долгата борба, Влада успеа да го преброди овој тежок период, а дополнителна победа за неговото семејство беше и успешното лекување на неговата мајка која имаше рак. Денес, пејачот ужива во новиот брак со сопругата Марија и во стабилниот однос со својата ќерка.
