Тереза Кесовија одржа емотивен проштален концерт во Сплит, со што го започна циклусот од четири најавени настапи со кои се збогува од музичката сцена по повеќедецениска кариера.
Првично концертот требало да се одржи во Хрватско народно казалиште во Сплит, но поради огромниот интерес бил преместен на Стари плац – поранешното игралиште на Хајдук Сплит.
И покрај здравствените проблеми, 87-годишната уметница излезе на сцената и со песна се прости од публиката. Концертот започна во 20:35 часот, а вечерта ја отвори водителката Мирта Шурјак, која зборуваше за животот и кариерата на Кесовија.
View this post on Instagram
„Мои мили луѓе. Ме прашуваа – зошто токму Сплит… Знам зошто. Дубровник е мојот роден град, но Сплит е Сплит… Тој ми даде форма и ми покажа што значи сигурност“, им се обрати пејачката на присутните.
На сцената стоеше потпирајќи се на стап, а во текот на настапот ѝ помагаа гостите, меѓу кои Ана Уршула Најев, Зринка Милиќ и Клапа Филип Девиќ.
„Толку години, 65 години – тоа не е малку, нели? Ви благодарам од срце… како да сонувам еден убав сон што се оствари“, рече таа, заблагодарувајќи му се и на градоначалникот Томислав Шута за преместувањето на концертот.
Со насмевка додаде: „Јас сакам поинтимни простори, театар… но вечерва сум горда што сум тука, на корените на Хајдук“.
