„Тијана плачеше на секоја моја песна“: Тамара откри како сестра ѝ реагирала на новиот албум, а раскажа и што најмногу сака да пее малата Хана

Пејачката Тијана Дапчевиќ плачела додека ги слушала новите песни на нејзината сестра Тамара Тодевска, кои се дел од албумот „Кукла жива“.
Тамара раскажа за емотивната реакција на сестра ѝ при гостувањето во утринската програма на Телма и откри дека двете конечно успеале да ја снимат заедничката песна „Далеку“, која наскоро треба да биде промовирана.
„Тијана плачеше, плачеше на секоја песна. Ми даде максимална поддршка. Многу ѝ беше жал што ‘Далеку’ не успеавме да ја снимиме навреме и да излезе на албумот. Меѓутоа, ете, собравме сили и ја снимивме деновиве за да ја завршиме. Едноставно, навистина немавме кога“, рече Тамара.
Таа потврди дека за песната ќе биде снимен и видеоспот. Со оваа соработка, двете сестри повторно ќе ги спојат гласовите во песна која има посебно место во приказната за новиот албум на Тамара.
Во разговорот, Тамара откри и една нежна семејна приказна поврзана со нејзината ќерка Хана, која со голема љубов ги слуша песните на мајка ѝ. Нејзина омилена е „Брана“, а особено се труди да отпее еден од најтешките делови.
„Хана најмногу ја сака ‘Брана’. Кога ќе влезе во кола, прво бара да ја пуштиме. Има едно делче кое е многу тешко за пеење и таа секојдневно го вежба и пробува да го испее“, раскажа Тамара.
Пејачката со насмевка објасни дека станува збор за долга вокална фраза за која се потребни многу воздух, сила и издржливост.
„Многу ми е слатка како го вежба тоа, колку се труди. И кога ќе успее да го испее, ќе ми рече: ‘Среќна сум, мама, го фатив!’“, рече Тамара низ смеа.
Оваа семејна приказна се надоврза на разговорот за три генерации жени, за силата што Тамара ја наследила од својата мајка и за вредностите што сака да ѝ ги пренесе на Хана.
Албумот „Кукла жива“ Тамара го промовираше на 3 септември во Скопје. На него се наоѓаат десет песни, кои ги напишаа Тамара и Коста Петров, а аранжманите и музичката продукција се на Џијан Емин. Во снимањето учествуваа повеќе од 60 музичари, а за песните се снимени и видеоспотови во режија на Мартин Трајановски.
Особено емотивна е песната „Брана“, посветена на мајката на Тамара и Тијана, Брана Тодевска. Во спотот се појавуваат и Брана и Хана, со што песната ги поврзува трите генерации жени од семејството.
Тамара на 7 декември ќе одржи голем солистички концерт во арената „Борис Трајковски“ во Скопје, под мотото „25 години љубов“. На концертот ќе го претстави новиот албум, но ќе ги испее и најголемите хитови од својата 25-годишна кариера. Ќе ја придружува оркестар предводен од Џијан Емин.