Српскиот актер Сергеј Трифуновиќ и неговата сопруга Исидора повторно се во центарот на вниманието по наводниот инцидент во еден белградски трговски центар.
По пишувањата на српските медиуми, Исидора Трифуновиќ реши јавно да се огласи и да ги демантира информациите што во последните денови се појавија во јавноста.
Што наводно се случило во трговскиот центар?
Според досегашните медиумски наводи, инцидентот се случил во една позната продавница, каде што обезбедувањето се посомневало во Исидора и побарало да ја претресе.
Нејзиниот сопруг Сергеј, според пишувањата на српските медиуми, бурно реагирал и не дозволил обезбедувањето да ги прегледа нејзините работи. Ситуацијата наводно прераснала во вербален конфликт, по што обезбедувањето повикало полиција.
Полицајците потоа го однеле брачниот пар во полициска станица.
Станува збор за наводи објавени во медиумите, додека Исидора сега ги отфрла тврдењата дека сторила нешто незаконско.
По медиумските написи, сопругата на актерот одлучила да се огласи преку социјалните мрежи.
Таа во својата објава навела дека во иднина постапувањето во врска со ваквите случаи им го препушта на своите адвокати и на надлежните институции.
„Веќе подолго време, а особено од крајот на 2024 година, мојот приватен живот е предмет на континуирано и често медиумско известување кое целосно ја изгуби врската со легитимниот јавен интерес. Во тој период за мене се објавени повеќе од сто текстови, меѓу кои има бројни неточни информации, произволни толкувања и сензационалистички конструкции“, напишала Исидора.
Таа додава дека старите наводи кои претходно биле оспорени повремено повторно се појавуваат во медиумите и се претставуваат како нови факти.
„Поради тоа сакам да бидам целосно јасна“, напишала таа, додавајќи дека досега не сметала дека е потребно својот приватен живот да го претвора во низа деманти.
„Наводите со кои во последните денови, директно или индиректно, ми се припишува незаконско постапување не се точни“, навела Исидора.
„Бракот со јавна личност не значи откажување од правата“
Во продолжението на објавата, сопругата на Трифуновиќ се осврнала и на границата меѓу јавниот интерес и приватноста.
„Насловот не е доказ. Инсинуацијата не е факт. Повторувањето на невистинита информација не ја менува нејзината природа. Јавниот интерес и љубопитноста на јавноста не се синоними. Бракот со јавна личност не значи откажување од правото на приватност, достоинство и вистинито информирање“, порача таа.
Исидора истакнала дека нема намера да влегува во јавни полемики со одделни медиуми, ниту пак секој нов наслов да го следи со ново соопштение.
„Немам намера да полемизирам со одделни медиуми, ниту на секој нов наслов да одговарам со ново соопштение“, додала сопругата на српскиот актер.
