Витамините се есенцијални хранливи материи за одржување на оптимално здравје, а еден од нив, витаминот Б12, има многу важна улога во функционирањето на нашиот организам. Токму затоа неговиот недостиг може да има сериозни последици врз здравјето.
Во продолжение ви пренесуваме повеќе информации за улогата на витаминот Б12, најчестите симптоми на негов недостиг, како и за најдобрите природни извори на овој важен нутриент.
Каква е улогата на витаминот Б12 во организмот?
Витаминот Б12, познат и како кобаламин, е клучен за многу важни функции во телото. Една од неговите најзначајни улоги е учеството во создавањето еритроцити, кои се одговорни за пренос на кислород низ организмот. Витаминот Б12, исто така, има клучна улога во одржувањето на здравјето на нервниот систем, како и во формирањето и регулирањето на ДНК – генетскиот материјал во телото.
Покрај тоа, овој витамин влијае врз синтезата и регулирањето на серотонинот, па затоа може да има влијание врз расположението и симптомите на депресија.
Кои се симптомите на недостиг на витамин Б12?
Недостигот на витамин Б12 може да предизвика различни симптоми, кои сами по себе најчесто не се доволни за да се постави дијагноза. Некои од најчестите симптоми се:
-замор и слабост,
-главоболки,
-проблеми со концентрацијата и помнењето,
-промени во расположението,
-депресија.
По извесно време може да се појават и невролошки проблеми, како што се вкочанетост или чувство на трнење во рацете и нозете.
Недостигот на витамин Б12 може да предизвика и анемија, чии најчести симптоми се замор, отежнато дишење, неправилна работа на срцето и бледа кожа.
Како да го проверите нивото на витамин Б12?
Доколку се сомневате дека имате недостиг на витамин Б12, најважно е да се консултирате со лекар. Со едноставна крвна анализа може сигурно да се утврди дали постои недостиг на витамин Б12 и навреме да се преземат потребните чекори за негово надоместување.
Најдобри извори на витамин Б12
Витаминот Б12 се наоѓа во бројни намирници од животинско потекло. Најдобри извори на витамин Б12 се:
-говедско месо,
-свинско месо,
-месо од живина,
-јагнешко месо,
-риба, особено туна и бакалар,
-млечни производи, како млеко, сирење и јогурт,
-јајца.
Обезбедувањето доволно количество витамин Б12 преку исхраната може да биде голем предизвик за лицата кои не консумираат намирници од животинско потекло.
Витаминот Б12 не се наоѓа во растителните намирници, па затоа се препорачува лицата што следат веганска или друга исхрана која ја ограничува консумацијата на производи од животинско потекло да користат додатоци во исхраната што содржат витамин Б12 или намирници збогатени со овој нутриент, како што се одредени растителни млека и житарици.
Доколку се појават симптоми што упатуваат на недостиг на витамин Б12, важно е да се провери неговото ниво со едноставен крвен тест и, во согласност со препораките на лекар, да се надомести преку исхраната или со додатоци во исхраната.
