Струмица ќе добие спомен-обележје за Џоко, тапанарот на ДНК кој загина во „Пулс“: „За нас, тој само се пресели на друга сцена“
Споменот на Ѓорѓи Ѓоргиев – Џоко, младиот струмички тапанар кој го загуби животот во пожарот во кочанската дискотека „Пулс“, од 5 септември ќе има свое трајно место во неговиот роден град.
Во Градскиот парк во Струмица, во близина на Домот на АРМ, ќе биде откриено спомен-обележје посветено на музичарот, неговата хуманост и љубовта што ја имаше кон музиката. Одлуката за поставување спомен-обележје – биста на Ѓорѓи Ѓоргиев и трагично загинатите жртви од пожарот во Кочани е донесена од Општина Струмица.
Џоко беше тапанар на „ДНК“ и кобната ноќ на 16 март 2025 година настапуваше со групата во „Пулс“. Неговата прерана смрт остави голема празнина меѓу семејството, пријателите, колегите музичари и сограѓаните.
Во Струмица беше познат и по прекарот „Џоко Тапанаро“. Уште пред да стане дел од „ДНК“, тој со години ја градеше својата музичка приказна и настапуваше со различни изведувачи и состави. Беше активен и како музички педагог, а неговите колеги од музичкото училиште „Боро Џони“ во Струмица по неговата смрт му оддадоа последна почит.
За неговото семејство, сепак, Џоко пред сè останува син и брат – човекот чие присуство не може да се замени со ниту еден споменик.
Неговиот татко Драги Ѓоргиев вели дека семејството со гордост ќе го чува сеќавањето на неговиот син, а спомен-обележјето ќе биде потсетник и за идните генерации.
„Споменикот за нас останува траен белег како фамилија и за сите генерации, сегашни и идни, кои ќе го паметат по неговата харизма, насмевка и топла душа кон секого.
Младите да ја запаметат неговата преголема љубов кон музиката, кон неговиот инструмент, тапанот, да го запаметат по неговите хумани дела“, вели Ѓоргиев за „В ТВ-Вистинска Телевизија“ од Струмица.
Тој додава дека Џоко и дома бил прекрасен син и изградена личност, и имал целосна поддршка од семејството во остварувањето на музичките соништа.
„За нас, како син и брат, беше непроценливо богатство. Секогаш позитивен, енергичен, и пред рефлекторите и кога ќе се изгаснат рефлекторите, полн со живот, полн со љубов и секогаш сакаше да биде помеѓу луѓето“, додава неговиот татко.
Последниот настап на Џоко пред струмичката публика бил на традиционалниот Струмички карневал. По неговото заминување, неговото име и музика продолжија да живеат преку оние со кои работел, пријателите, семејството и публиката.
На 5 септември Струмица ќе му оддаде уште една почит. Спомен-обележјето во Градскиот парк ќе остане како место што ќе потсетува на младиот музичар и неговиот живот, но и на човекот кој, како што вели неговиот татко, за најблиските никогаш вистински не заминал – туку само „се преселил на друга сцена“.
