Започнавме убава соработка со една врвна готвачка која секое јадење го претвара во магија од вкусови – Теодора Георгиевска.
Оваа извонредна мајсторка и една од највлијателните готвачки на социјалните мрежи кај нас, стои зад бројните рецепти кои ги објавува на профилот „Готвиме со Теа“ – „gotvime.so.tea“.
„За Васината торта се смета дека е автентична српска торта чиј рецепт датира уште од дамнешната 1908 година. И покрај тоа што е многу стар рецепт, сè уште се подготвува и е една од најубавите торти. За да не ви падне шеќерот, засукајте ги ракавите и подгответе ја оваа прекрасна торта“, вели Теа.
View this post on Instagram
(@gotvime.so.tea)Потребни состојки:
За фил:
- 250 гр путер
- 200 гр шеќер во прав
- 250 гр мелени ореви
- 150 мл млеко
- 6 лажици шеќер
- 4 жолчки
- 100 гр чоколадо
- кора од портокал
За пандишпан:
- 4 јајца
- 4 лажици шеќер
- 1 лажица брашно
- 4 лажици мелени ореви
За шлаг од белки:
- 4 белки
- 8-10 лажици шеќер
- 2-3 лажички сок од лимон
Подготовка:
Млекото заедно со 2 лажици шеќер се става да зоврие, а потоа во него се додаваат мелените ореви. Убаво се меша, се трга на страна и се остава да се излади. Жолчките се матат на пареа со 4 лажици шеќер и на крај се додава чоколадото. Путерот се мати со 200 гр. шеќер во прав додека да стане пенест. Сите 3 фила откако ќе се изладат се мешаат заедно и се додава рендана кора од портокал. 4 јајца се матат со 4 лажици шеќер. Откако ќе се изматат се додава 1 лажица брашно и 4 лажици мелени ореви. Убаво се меша и става да се пече во округло тавче 10 минути на 200 степени. Изладениот пандишпан се филува со претходно подготвениот фил и одозгора се става шлаг од белки. 4 белки изматете ги со 8 лажици шеќер за да добиете густ шлаг и на крај додадете го сокот од лимон. Украсете со пачиња портокал, убаво изладете ја тортата и уживајте во вкусот заедно со чаша добро кафе.
На здравје!
