Актерката Џуди Грир откри непријатна случка од раните денови на кариерата, кога нејзиниот колега Метју Меконахи ѝ позајмил 20 долари за да може да плати паркинг.
Двајцата работеа заедно на романтичната комедија „Организатор на свадби“ (The Wedding Planner), а Грир во интервју за „Ентертејмент тунајт“ раскажа дека токму тој ѝ помогнал во период кога финансиски едвај се снаоѓала.
Во филмот, режиран од Адам Шенкман, таа ја игра Пени Николсон – амбициозна соработничка на главната хероина Мери Фиоре, чија улога ја толкува Џенифер Лопез. Остварувањето, снимано претежно во Сан Франциско, со текот на времето стекна култен статус, а Грир и денес со задоволство се навраќа на тој проект.
Таа раскажа дека особено ѝ било драго кога наутро ќе налетала на Меконахи додека се подготвувал за снимање, често во пижами и со шолја чај.
Грир се потсети и на моментот кога актерската екипа се собра на читање на сценариото во хотелот „Рузвелт“ во Њујорк. Тогаш го оставила автомобилот на хотелскиот паркинг, не сфаќајќи колку ќе чини услугата.
Кога сакала да си го подигне возилото, увидела дека нема доволно пари за да ги покрие трошоците. Во паника се обидела да побара помош од пријател, но Меконахи ја слушнал и веднаш реагирал.
„Ми даде 20 долари. Ми беше многу непријатно, но во истиот момент си реков: ‘Мој херој’“, изјави актерката.
