Во прекрасното Јадранско Море, меѓу повеќе од 1.000 острови, островчиња и гребени, еден остров и до ден-денес успеал да остане малку див и недопрен. Тоа е островот Вргада, со површина од 3,32 квадратни километри, кој според пописот од 2021 година има само 209 жители. На Вргада нема автомобили, има само една продавница, а ресторани и кафулиња – сосема малку. Но затоа природата е прекрасна, плажите се рајски, а ритамот на животот е вистински медитерански, опуштен и идиличен.
Дури две третини од островот се покриени со густа боровa шума, па одморот во исконска природа, со мирис на море и бор, тука е загарантиран.
Островот се гордее со прекрасни песочни заливи и плажи, а го опкружува кристално чисто море.
Вргада често ја нарекуваат и „златен остров“ поради заливите со златен песок какви што ретко се гледаат на копното. Најубава на островот, а според многумина и една од најубавите во Хрватска, е плажата Подбризи. Таа сосема необична песочна плажа е опкружена со вертикални карпи, а на една од нив се наоѓа и еден од најпрепознатливите фотографски мотиви на Вргада.
Дрво што ѝ пркоси на гравитацијата стои на самиот раб на карпата и со години им одолева на бурата и на сите временски непогоди.
